Арилжааны гүйцэтгэлийг нэмэгдүүлэх микро дадлууд.

Өнөөдөр “яг төвлөрөөд арилжаагаа сайн хийе” гэж шийдсэн ч, оройтож унтаад өглөө ядраад эхэлсэн удаа танд бий юу?

Бидний ихэнх нь алдагдлаа график дээр биш, харин өөрийн энергийн удирдлага дээрээ хүлээж байдаг. Арилжаачид стратеги, индикатор, техникээ сайжруулахад ихэнх цагаа зарцуулдаг ч амжилтыг шийддэг хамгийн том хүчин зүйл бол таны оюун ухаан, бие махбод юм.

Амжилттай арилжаа бол зөвхөн зах зээлийн мэдлэгээр зогсохгүй. Таны шийдвэр гаргах хурд, алдаанаас суралцах чадвар, сэтгэл хөдлөлөө удирдах арга барил бүгд биеийн төлөвөөс шалтгаалдаг.

• Ядрах үед төвлөрөл суларна.
• Нойр дутуу үед эрсдэлийн мэдрэмж алдагдана.
• Буруу хооллолт сэтгэл хөдлөлийг тогтворгүй болгоно.
• Хөдөлгөөнгүй суух нь эргэлзээг улам нэмэгдүүлнэ.

Тэгвэл нойр, хооллолт, дасгал хөдөлгөөн нь хүний оюун санааны үйл ажиллагаанд хэрхэн нөлөөлдгийг шинжлэх ухааны үндэслэлтэйгээр авч үзье.

1. Нойр = Сайн арилжаа


Harvard болон NSF-ийн судалгаагаар нойр дутуу үед шийдвэр гаргах чадвар 30%-иар буурдаг. Арилжааны хэллэгээр бол -2%-ийн жижигхэн алдагдлыг -10% хүртэл томруулж буйтай адил. Нойр бол зүгээр нэг амралт биш, харин тархи мэдээллээ боловсруулах, дүгнэлт гаргах, алдаанаас суралцах цорын ганц боломж юм.

2. Тархи ба ходоодны хамаарал бодсоноос илүү хүчтэй


Nutrients сэтгүүлд нийтлэгдсэн судалгаагаар зөв зохистой, тэнцвэртэй хооллолт нь төвлөрлийг хадгалах, сэтгэл санааг тогтвортой байлгахад шууд нөлөөлдөг. Таны бие бол арилжааны хамгийн том хөрөнгө оруулагч. Хэрэв түүндээ зөв түлш өгч чадахгүй бол ямар ч нарийн график шинжилгээ нэмэргүй.

3. Дасгал хөдөлгөөн бол тархины Reset товч


Harvard Medical School-ийн мэдрэлийн судлаачид тогтмол, богинохон хөдөлгөөн хийх нь асуудал шийдвэрлэх чадварыг мэдэгдэхүйц нэмэгдүүлдэг гэж тогтоосон. График руугаа хэт удаан ширтээд шийдвэрээ улам бүр эргэлзээтэй болгож байсан уу? Тэр мөчид зүгээр л босож алхах эсвэл хоёр минут сунгалт хийх нь тархийг дахин асааж, анхаарлыг шинэчилдэг.

Амжилттай арилжаа хийхийн тулд стратегиа төгс төгөлдөр болгохоос гадна өөрийнхөө “эрсдэлийн менежмент”-ийг бие махбодоороо хэрэгжүүлэх хэрэгтэй. Бид бүгд мэддэг ч өдөр тутамдаа хэрэгжүүлэхээ мартдаг энгийн дадлуудыг энд хүргэе:

• Тогтмол цагт унтаж, сэрэх зуршил тогтоох
• Арилжааны өмнө тархиа амрааж, шийдвэр гаргах бэлтгэл хийх
• Өглөөний цайгаа алгасахгүй байх
• Нүүрс ус, уураг, усны тэнцвэрийг хангах
• Арилжааны үеэр 45–60 минут тутамд босож алхах
• Богинохон сунгалт, амьсгалын дасгал хийх

Арилжааны амжилт зөвхөн техник биш, харин өөрийгөө удирдах ур чадвар юм. Нойр, хоол, хөдөлгөөн бол таны биеийн “эрсдэлийн удирдлага”. Харин амжилт бол урьдчилан томьёологдсон томьёо биш өөрийн хязгаарт тултал хичээн, дахин дахин Reset хийж, өөрийгөө удирдаж сурахдаа мэдэрдэг амьдралын мөч юм.