Алдагдал хаанаас эхэлдэг вэ?

Арилжааны ертөнцөд олон хүн амжилттай арилжаач болохыг хүсдэг ч ихэнх нь зорилгодоо хүрч чаддаггүй. Энэхүү нийтлэлдээ бид арилжаачид яагаад бүтэлгүйтдэг, алдагдал яг хаанаас эхэлдэг талаарх үндсэн гол шалтгаануудыг авч үзэж, эдгээрээс хэрхэн урьдчилан сэргийлэх талаар хүргэхийг зорилоо.

1. Эрсдэлийн менежмент дутмаг

Арилжааны хамгийн чухал зүйл бол эрсдэлийн менежмент юм. Ихэнх арилжаачид эрсдэлээ хуваарилах болон хамгаалах стратегигүйгээр зах зээлд ордог. Жишээлбэл, тэд хэт их хөрөнгөөр арилжаа хийж, ганцхан алдаанаас үүдэн их хэмжээний алдагдал хүлээдэг. Эрсдэлийн менежментгүй бол урт хугацаандаа ямар ч арилжаач амжилтад хүрэх боломжгүй.

Зөвлөгөө:

• Нэг арилжаанд нийт хөрөнгийн 1-2%-иас илүүг оруулахгүй байх.
• "Stop-loss" буюу алдагдлыг хязгаарлах.
• “Revenge trading” буюу алдагдлаа хүчээр нөхөх гэж оролдохоос зайлсхийх

2. Сэтгэл хөдлөлдөө хэт автах

Сэтгэл хөдлөл бол арилжааны гол дайсан. Айдас, шунал, эсвэл өөртөө хэт итгэх нь арилжаачдыг буруу шийдвэр гаргахад хүргэдэг.

Сэтгэл хөдлөлийн нийтлэг алдаанууд:

• Хэтэрхий их арилжаа хийх (overtrading)
• Алдагдлыг хэт удаан барих
• Тохиромжгүй үед арилжаанд орж “FOMO” буюу боломжийг алдахаас айх

3. Мэдлэг, мэдээлэл дутмаг

Зах зээлийн талаар хангалттай мэдлэггүйгээр арилжаа хийх нь тоглоомтой адил байна. Ихэнх шинэхэн арилжаачид техникийн шинжилгээ, зах зээлийн чиг хандлага, эсвэл эдийн засгийн хүчин зүйлсийн талаар сайтар судлалгүй арилжаанд ордог.

Зөвлөгөө:

• Үндсэн болон техникийн шинжилгээний ойлголтыг бүрэн сайн эзэмших
• Мэдээ, мэдээллийн эх сурвалжуудыг тогтмол хянах
• Төв банкнуудын шийдвэр, эдийн засгийн хуанлийг цаг тухайд нь уншиж байх

4. Бодит бус хүлээлт

Форекс бол хурдан баяжих арга биш. Энэ бол тогтмол ашигтай байх системтэй, тэвчээртэй стратегитай үйл ажиллагаа юм. Шинэ арилжаачид ихэнхдээ хурдан үр дүн хүлээж, хөрөнгөө эрсдэлд оруулдаг.

Зөвлөгөө: Жижиг амжилтаас эхэлж, аажмаар ур чадвараа хөгжүүл. Богино хугацаанд их ашиг олохыг хэт хүлээх хэрэггүй.

• Дунд болон урт хугацааны зорилгоо тодорхойлох
• Ашиг хүлээхээс илүү систем баримтлах зарчим стратегийг мөрдөх
• Демо данс ашиглан дадлага туршлага олж авах

5. Алдаанаасаа суралцахгүй байх

Хэрвээ та арилжааны тэмдэглэл (trading journal) хөтөлдөггүй бол яг ямар шалтгаанаар алдагдалд орж буйгаа хурдан хугацаанд ойлгох боломжгүй.

Зөвлөгөө:

• Арилжаа бүрийн дараа: зөв болон буруу байсан зүйлсээ тэмдэглэх
• Өөрийн зан байдлыг анхаарч, системийн болон сэтгэлзүйн алдааг ялгаж сурах

Дүгнэлт

Алдагдал гадаад хүчин зүйлээс биш, дотоод хандлага, мэдлэггүй байдал, сэтгэл хөдлөлөөс эхэлдэг. Арилжаа бол ур чадвар бөгөөд цаг хугацаа, хичээл зүтгэлээр хөгждөг. Мэдлэгээ нэмэгдүүлж, сэтгэл хөдлөлөө хянаж, сахилга баттай хандсанаар л арилжаач та амжилтад хүрнэ.

Start small, Grow BIG.